१ फागुन, बुटवल-बुटवलमा स्कुल बस दुर्घटना हुँदा १० जना घाइते भएका छन् । आइतवार बिहान विद्यार्थी बोकेको एभरेष्ट बोर्डिङ स्कुलको लु १ क ५४४ नम्बरको बस बुटवल उपमहानगरपालिका ४ स्थित ज्योतिनगरमा दुर्घटना भएको हो।
घाइतेमध्ये ८ जना विद्यार्थी, चालक र सहचालक रहेको लुम्बिनी प्रदेश ट्राफिक प्रहरी कार्यालय बुटवलले जानकारी दिएको छ। घाइते सबैलाई उपचारका लागि बुटवलस्थित लुम्बिनी प्रादेशिक अस्पतालमा पठाइएको छ।
घाइतेमध्ये ३ जना विद्यार्थी, चालक र सहचालकको अवस्था मध्यम रहेको र अन्य विद्यार्थीको अवस्था सामान्य रहेको छ। उक्त बसमा ८ जना विद्यार्थी, चालक र सहचालक गरी १० जना रहेको बताइएको छ।
ओरालोमा ब्रेक फेल भएका कारण बस दुर्घटना भएको प्रहरीको अनुमान रहेको छ। कोरोनाको तेस्रो लहरका कारण बन्द रहेका विद्यालयहरु आजदेखि भौतिक उपस्थितिमा सञ्चालन भएका छन्।।
प्रकाशित मिति : २०७८ फाल्गुन १ गते आइतवार
