लमही खानेपानी उपभोक्ता तथा सरसफाई उपभोक्ता संस्थाको १६ औं बार्षिक साधारण सभाको उद्घाटन गर्दै लुम्बिनी प्रदेश सभा सदस्य माननीय सांसद रेवतीरमण शर्माले प्रदेश सरकारले खानेपानी र स्वास्थ्यको क्षेत्रमा बजेट अभाव हुन नदिने बताउनु भएको छ ।
प्रमुख अतिथि समेत रहनु भएका शर्माले कोभिड–१९ ले गर्दा बजेट व्यवस्थापनमा केही असहजता आएपनी खानेपानी र स्वास्थ्य क्षेत्रमा सरकारले प्राथमिकता राखेकाले बजेटको अभाव हुन नदिइने बताउनु भयो । यसैगरी उहाँले खानेपानीको बैकल्पिक स्रोतको व्यवस्थापन गर्न आग्रह गर्नु भएको छ । भविस्यमा खानेपानीको समस्या पर्न सक्ने भएकाले अहिलेबाटै बैकल्पिक स्रोतको पहिचान र व्यवस्थापनमा ध्यान दिन आग्रह गर्नु भयो ।‘भविस्यमा के कस्तो समस्या आईपर्छ, हामीले आँकलन गर्न सक्छौं । त्यही भएर बैकिल्पक स्रोतको पहिचान गर्न जरुरी छ’उहाँले भन्नुभयो–‘पानीको मुहान संरक्षणनै आजको प्रमुख आवश्यकता हो ।’
लमही खानेपानी उपभोक्ता तथा सरसफाई संस्थाका अध्यक्ष दण्डिराम चौधरीको अध्यक्षतामा सम्पन्न कार्यक्रममा नेपाल कम्यूनिष्ट पार्टी नेकपाका जिल्ला सदस्य भानु जोशी, नेपाली कांग्रेसका पार्टी प्रतिनिधि कुमार घिमिरे, राष्ट्रिय जनमोर्चाका नगर अध्यक्ष ताराप्रसाद खनाल, लमही खानेपानी उपभोक्ता तथा सरसफाई संस्थाका पूर्व अध्यक्ष तथा लमही नगरपालिका वडा नंं ५ का अध्यक्ष विमबहादुर केसी, तुलसीपुर खानेपानी उपभोक्ता तथा सरसफाई संस्थाका अध्यक्ष खेमराज ओली, लमही खानेपानी उपभोक्ता तथा सरसफाई संस्थाका सल्लाहकार तथा पूर्व अध्यक्ष कर्णबहादुर बुढाथोकी, नारायणपुर खानेपानी उपभोक्ता तथा सरसफाई संस्थाका अध्यक्ष श्रवण रजौरे, उपभोक्ता सूर्यराज गौतम, पत्रकार राधेश्याम गुप्ता लगायतका वक्ताहरुले मन्तब्य ब्यक्त गर्नु भएको थियो ।
