१७ मंसिर,घोराही –
कुनै पनि बालबालिका श्रममा नभएको पुष्टि गर्दै रोल्पाको त्रिवेणी गाउँपालिका ५ बालश्रम मुक्त वडा घोषणा भएको छ । त्रिवेणी गाउँपालिकाको बालश्रम मुक्त गर्ने तीन वर्षे रणनीति योजना र लक्ष्य पूरा भएको भन्दै गाउँपालिका अध्यक्ष शान्तकुमार वलीले पालिकाको पहिलो वडाको रूपमा वडा नं. ५ जुगारलाई बालश्रम मुक्त घोषणा गर्नुभएको हो ।
’असल अभिभावक, सुरक्षित बालबालिका ः सुखी र समृद्ध त्रिवेणी गाउँपालिका’ मूल नाराका साथ त्रिवेणी गाउँपालिकाले बाल श्रम निवारणसम्बन्धी रणनीति योजना २०७५—२०७७ निर्माण गरी कार्यान्वयन गरेको हो ।
यो रणनीति योजना निर्माण र कार्यान्यवन गर्न सेभ द चिल्ड्रेन र मानव अधिकार सचेतन केन्द्र (हुरेक) नेपाल रोल्पाले सहजीकरण गरेको वडा नं. ५ का अध्यक्ष कृष्ण केसीले बताउनुभयो ।
परम्परागत रूपमै पहिलेदेखि नै रोल्पाबाट विद्यालय उमेरका बालबालिका इँटा भट्टा लगायतका जोखिमपूर्ण श्रममा जाने समस्या रहँदै आएकोमा त्रिवेणी गाउँपालिकाले त्यसको निवारणका लागि पहल गरेको गाउँपालिकाका अध्यक्ष शान्तकुमार वलीले बताउनुभयो ।।
