१५ कात्तिक,काठमाडौं – प्रदेश १ का मुख्यमन्त्री भीमप्रसाद आचार्यले प्रदेशसभा बैठकमा आज विश्वासको मत लिनु हुने भएको छ ।
मुख्यमन्त्री आचार्यले प्रदेशसभा बैठकमा कात्तिक ५ गते विश्वासको मतका लागि पेस गर्नुभएको प्रस्तावमाथि छलफल गरी आज मत विभाजन प्रक्रियाद्वारा टुंग्याउने कार्यसूची तय गरिएको छ ।
एमाले विभाजित हुँदा १० जना प्रदेश सांसद् एकीकृत समाजवादीमा लागेपछि एकल बहुमतमा रहेको मुख्यमन्त्री आचार्य अल्पमतमा पर्नुभएको हो । मुख्यमन्त्री आचार्यविरुद्ध काँग्रेस, माओवादी केन्द्र, एकीकृत समाजवादी, जसपा र संघीय लोकतान्त्रिक राष्ट्रिय मञ्चले गठबन्धन बनाएका छन् ।
प्रदेशसभामा ९२ सदस्य रहेकामा नेकपा एमालेसँग सभामुखसहित ४१ सांसद छन् । मुख्यमन्त्री आचार्यलाई विश्वासको मत प्राप्त गर्न कम्तीमा ४६ सांसद् संख्या आवश्यक हुन्छ ।
विपक्षी गठबन्धन काँग्रेसको २१, माओवादी केन्द्र १५, एकीकृत समाजवादी १०, जसपासँग तीन र संयुक्त लोकतान्त्रिक राष्ट्रिय मञ्चसँग एक जना सदस्य छन् । अल्पमतमा पर्ने अवस्थमा मुख्यमन्त्री आचार्यले राजिनामा दिएर नयाँ सरकार गठनका लागि मार्ग प्रशस्त गर्नुहुने सम्भावना रहेको एक नेताले बताए । मुख्यमन्त्रीले राजिनामा दिए प्रदेश प्रमुखको कार्यालयले नयाँ सरकार गठनका लागि बहुमत सहित दाबी गर्न दलहरुलाई कम्तीमा २४ घण्टाको समयसीमा दिनुहुनेछ ।
यसैबीच विपक्षी गठबन्धनले नेकपा (एकीकृत समाजवादी) संसदीय दलका नेता राजेन्द्र राईलाई मुख्यमन्त्री बनाउने निर्णय गरेको छ । नेपाली काँग्रेस, माओवादी केन्द्र, एकीकृत समाजवादी, जनता समाजवादी पार्टी र संयुक्त लोकतान्त्रिक राष्ट्रिय मञ्चको आइतबार बसेको बैठकले मुख्यमन्त्रीमा राईलाई समर्थन गर्ने निर्णय गरेको हो । बैठकले प्रदेशका मुख्यमन्त्री आचार्यको विपक्षमा मतदान गर्न सबै दलले सांसदहरूलाई ह्विप जारी गर्ने निर्णय समेत गरेको छ ।
काँग्रेस संसदीय दलका प्रमुख सचेतक केदार कार्कीले अब बन्ने नयाँ सरकारको नेतृत्व राईले गर्ने बताउनुभयो । मुख्यमन्त्री नियुक्तिपछि मन्त्रालय भागबण्डा लगायत अन्य विषयमा छलफल गर्ने निर्णय गरेको माओवादी केन्द्र संसदीय दलका नेता इन्द्रबहादुर आङ्बोले जानकारी दिनुभयो ।
