लुम्बिनी प्रदेश प्रहरीकै घुमुवा रकम असुलीमा, व्यापारीसँग ५ लाख लिए

प्रहरीका अनुसार पक्राउ पर्नेहरूमा लुम्बिनी प्रदेश प्रहरीबाट खटाइएका प्रहरी सहायक हवलदार मोहम्मद सफिक खान, परमानन्द कूर्मी, सशस्त्र प्रहरीका जवान रामसुन्दर चौधरी, कोहलपुर–११ निवासी मोबाइल तथा इलेक्ट्रोनिक्स व्यवसायी संघ बाँकेका अध्यक्ष गोविन्द भण्डारी र अभियान्ता बताउने सूर्यप्रसाद रिजाल रहेका छन् ।  बाँकेको कोहलपुर नगरपालिका–११ स्थित पुरानो बसपार्क नजिकै ‘थ्रिस्टार मोबाइल पसल’ सञ्चालक लक्ष्मण कुँवरबाट ५ लाख रुपैयाँ असुली गरिएको उजुरीको आधारमा उनीहरूलाई प्रहरीले पक्राउ गरेको हो ।

उजुरी दर्ता भएपछि प्रहरी सहायक हवलदार खान, कुर्मी, भण्डारी र रिजाललाई जेठ २८ गते र सशस्त्र जवान चौधरीलाई २९ गते पक्राउ गरिएको जिल्ला प्रहरी कार्यालय बाँकेका निमित्त सूचना अधिकारी यामबहादुर बुढाले जानकारी दिए ।

उनका अनुसार सादा पोशाकमा पुगेका ती व्यक्तिहरूले आफूहरू ‘नार्कोनन अनुसन्धान विभाग’बाट आएको भन्दै डर देखाई व्यापारीलाई लागुऔषध मुद्दामा फसाउने धम्की दिँदै रकम असुल गरेका थिए ।

घटनामा संलग्न प्रहरी सहायक हवलदारहरूको दरबन्दी लागूऔषध नियन्त्रण ब्युरोमा रहेको र लुम्बिनी प्रदेश प्रहरी कार्यालयमा रहने गरि मौखिक रूपमा बाके र बर्दियाको जिम्मेवारी दिईएको जनाइएको छ । सशस्त्र प्रहरी जवान चौधरी भने चौलिकास्थित सशस्त्र प्रहरी बल नम्बर ३० गणबाट खटिएका घुमुवा हुन् । पक्राउ परेका उनीहरुलाई इलाका प्रहरी कार्यालय कोहलपुरमा राखिएको छ ।

व्यापारीले रकम बुझाउने क्रममा भारतीय नम्बर प्लेट (यूपी ५० एए ९८८५) को कारमा आएका ती व्यक्तिहरूको गतिविधि सीसीटीभीमा कैद भएपछि घटना सार्वजनिक भएको थियो । अनुसन्धानका क्रममा स्थानीय गोविन्द भण्डारी र सुर्य रिजालले घुमुवा प्रहरीसँग मिलेमतो गरेको पुष्टि भएको छ । पक्राउ परेका पाँचै जनाविरुद्ध ‘आपराधिक लाभ’ सम्बन्धी कसुरमा मुद्दा दर्ता गरेर अनुसन्धान अघि बढाइएको बाँके प्रहरीले जनाएको छ । हाल लुम्बिनी प्रदेश कार्यालय तुलसीपुरका प्रमुख तथा डिआइजी राजेन्द्र प्रसाद भट्ट छन ।।